مراجعة كتاب : المضحكون
إسم الكتاب: المضحكون
المؤلف: محمود السعدنى
النوع: نقد فني
التقييم الشخصي: ★★★
وانت بتبدأ في كتاب زي دا لازم تفتكر انه اتكتب سنه ٦٩ ،يعنى اغلب المذكورين كانوا ف منتصف او بدايه رحلتهم.
وكمان عشان تعرف تتفهم المكتوب لانه زمن غير الزمن وناس غير الناس ،، واكيد ناس كتير كانوا وقتها محدش عارفهم، بس بعد كدا بقوا عمالقه ومعروفين، ف مش متوقع مننا نيجي بعد مدة ونقول الكلام دا غلط او صح .. في النهاية دا رأي الكاتب وحده.
الكتاب مش عن مشاهير الضحك بس، لكن عن الكومبارسات وحتى مؤلفين افلام كوميدية، زي بهجت قمر العبقري -من وجهه نظرى- والذي اصبح ابنه خليفته.
أعيب علي الكاتب سخريته الواضحة من صفات جسمانية.. ووصف البعض بإنه تخين كالبغل او ضخم كالدولاب او رفيع كالمقشة، او وصفه البعض بالعبط والهبل والتفاهة والوصولية، وإنه قال علي فؤال المهندس انه اتجوز الملبن عشان يوصل وان دي طريقته الوحيده انه يبقي ثنائي الحسناء والوحش.. لكن في النهايه دا اسلوب السعدنى.
اختلفت الاراء ام اتفقت، ف للكاتب رؤيته الخاصه اللي كتبها ونشرها وقرأها كثيرون ... وتظل رؤية معاصرة لزمن لم نحيا فيه ولأشخاص لم نقابلهم.
الكتاب صدر لأول مرة عام ١٩٦٩ وتم اعادة طباعته عام ١٩٩٥ .. والسعدني قال إنه إتطلب منه يعدّل المكتوب بما يوافق التطور والشهرة اللى حصلت للمذكورين ف كتابه، ولكنه رفض للحفاظ على فكرة الكتاب كتقييم من زمن مختلف، اثبت بعضهم صحته وبعضهم اثبت فشله، وعشان يوضح ان النقد عمليه ذاتية مش حكم سيلتصق بصاحبه ويحدد مصيره.
جدير بالذكر ان الكاتب محمود السعدني هو الأخ الأكبر للفنان صلاح السعدني، واللى اتذكر ف الكتاب إنه من شلة وجيل المضحكين العيال زي عادل إمام،وقال ان صلاح ورث عداوة سينيمائيين كتير بسببه وانهم اهملوا صلاح السعدنى عمدا انتقاما من اخوه.
اللغة تتأرجح بين العامية وبين الفصحى البسيطة، وحجم الكتاب نفسه صغير (١٩٣ صفحة) ومن النوع الذي ينتهى في جلسة واحدة.
تعليقات
إرسال تعليق