شعر عامية .. حلالي
.jpeg)
حلالي ل همسه عادل "شيماء"
____________________________
يا واجعة القلب بهمومك
وحاشرانى جوة دولابك… وسط هدومك
وفاكرانى چاكيت جلد
جايباه من بلاد الهند
انا قلبي اصله قماش
قطر العمر بيا ماشي
مبيستناش
كان ف يوم ليا سعر
دلوقتى بقيت ببلاش
…
يا راسمانى قلب رصاص
ورب الكون انا حبيتك ، وبإخلاص
اتاري الحب ملوش قيمة
والدنيا متتوصاش
عنوانى بعدك ف كتاب
والدين مبقاش ملة
لكنه بقا سباب
دقيت علي الابواب
واهل الدار مفتحوليش
ف متعانديش
وتعالي اكونلك دار
اهل ، حبيب وجار
واكونلك صحاب
…
يا واقفه وباصه ف مراية
انا ف حبك اعمى
وظلمنى عمايا
دوقتى دفا بطاطينك
تعالي ودوقي دفايا
يمكن يحلالك
وتبقيلي دنيا وابقالك حلالك
يا شاغلانى بخيالك
طلعي صورى من دولابك … ورصيهم ع الحيطه
انا جايلك بالزفه والزيطه
والمهر والدبلة
كنتى فاكرانى هسيبك ؟!! … هبلة
انا اصلا عاشقك وبالفطرة
وحالف بيكى يمين لو فاكرة
ومولود بيكى اسم ودين
مهما ابعد واغيب ،، اروح من حبك فين
ف متزعليش
انا جايلك بفستانك
معايا ومتفصل عشانك
لو قالولك يوم نسيكى … متصدقيش
وقوليهم انا ارضه وسماه
من غيري ميقدرش يعيش ❤️
#بحبك_يا_حلالي
#همسه_عادل
تعليقات
إرسال تعليق